Sakbay ti inka panagbanyaga
sirmataem ti saguday
ti agur-uray kenka
naindaklan nga gungguna
ti iso-amin nga rigatmo
ket no napateg ken nadayag
naisangsangayan ti adda
dita let-ang ta barukongmo
naregregta pay ti riknam
ti inka panakagteng
ti narukod nga papanam
ket awan lapped, madanonmo.
Anian nga ragsak
ti sumangbay kenka
natungpal ti tagtaga-inepmo
kasla magawgaw-atmon ti kunam
ti patingga ti dalan
ket matil-ay mon ti pas-suan.
No la ket naisang-sangayan
ti darepdep ken tarigagaymo
agsapul ka ti panglakagam
birokem ti nalinteg
nga dalan ni ballegi.
Liklikam nga gamden ti aglabsing
ti pagannorutan ti padam a tao
ken pagannurotan ti Dios
dika manglinteg, anusamto
nga surotem ti nairanta nga desdes
uray ad-adayo wenno killo-killo.
Pannubok nga saan nga malitopan
makitamon ti raniag ti aglawlaw
ragsak ken nam-ay nga agur-uray
riknaem the lamiis ti poyupoy
nalamuyot nga mangapros ta rupam
kankanta ken salsala ti madatnam
paraiso ti panagbiag, inkan mananam.
